Գունավոր վիտամինները. ankakh.com

Վիտամինները գույներ ունեն. կարմիրը` հակաօքսիդանտներն են, կանաչը` ոսկրերի ու ատամների համար են: Իսկ մրգերում ու բանջարեղենի մեջ վիտամինների մի ամբողջ ծիածան կա: Մրգերն ու բանջարեղենը բաժանվում են ոչ միայն ընտանիքների, տեսակների ու ենթատեսակների, ինչպես սովորեցրել են կենսաբանության դասերին, այլև` գույների, ինչը շատ ավելի պարզ է: Տարբեր գույների մրգերն ու բանջարեղենը որոշակի վիտամիններով ու օգտակար նյութերով են հարուստ: Ու երբ սեղանին ենք դնում գունավոր պտուղները, իրականում, մի ամբողջ փունջ օգտակար նյութեր ենք ունենում:

Ուրեմն, ի՞նչ է իրենից ներկայացնում կարմիրը

Դա լիկոպինի գույնն է, որը հակաօքսիդանտ հատկություն ունի, դանդաղեցնում է աթերոսկլերոզի զարգացումն ու հուսալի պաշտպանություն ստեղծում ԴՆԹ-ի համար: Հետևաբար, օգնում է կանխելու շագանակագեղձի, թոքերի ու ստամոքսի քաղցկեղը, սրտի իշեմիկ հիվանդությունները: Նվազեցնում է  կատարակտի զարգացման ռիսկն ու պայքարում լնդերի հիվանդության դեմ: Լիկոպին են պարունակում լոլիկը, կարմիր թուրինջը, ձմերուկը:

Նարնջագույն

Նյութը` բետա-կարոտին. հզոր հակաօքսիդանտ է, անհրաժեշտ իմունիտետի, աչքերի ու մաշկի համար: Պարունակում է դդմի, գազարի, դեղձի, սեխի, ծիրանի, արմավի մեջ:

Դեղին

Նյութը` ալֆա-կարոտին. պայքարում է վարակների դեմ, նպաստում մաշկի երիտասարդացմանը , տեսողության սրությանը, անհրաժեշտ է թե՛ կանանց և թե՛ տղամարդկանց վերականգնողական ֆունկցիայի համար: Նպաստում է վերքերի արագ սպիացմանը: Պարունակում են կիտրոնը, դեղին թուրինջը, արքայախնձորն ու նեկտարինը:

Կանաչ

Ինդոլի, լյուտեինի, կալցիումի գույնն է. բարելավում է տեսողությունը, ոսկրերի ու ատամների վիճակը, նվազեցնում է քաղցկեղային հիվանդությունների զարգացման ռիսկը: Պարունակում են կիվին, ավոկադոն, լայմը, արտիճուկը, ծնեբեկը, բրոքքոլին, վարունգը, հազարը, մաղադանոսը, սպանախը, կանաչ ոլոռը, խաղողը:

Մանուշակագույն

Այս գույնն ունեն ֆլավոնոիդներն ու անտոցիանները: Սրանք խթանում են իմունիտետն ու ուղեղի գործունեությունը, պայքարում սթրեսների ու քաղցկեղի որոշ տեսակների զարգացման դեմ: Պարունակում են սև հաղարջը, մոշը, խաղողի մուգ տեսակները, սև սալորը, սմբուկը:

Սպիտակ ու շագանակագույն

Նյութը` կվերցիտին, ազդեցությունը` հակաայտուցային, հակասպաստիկ, հակահիստամինային, հակաբորբոքային: Կվերցիտինը կիրառվում է բրոնխիալ ասթմայի, սիրտ-անոթային համակարգի, այրվածքների, ցրտահարության, բորբոքային հիվանդությունների ու կատարակտի բուժման նպատակով: Պարունակում են սոխը, սխտորը, մուգ գույնի խաղողը, սպիտակագլուխ կաղամբն ու ծովաբողկը:

Հարցեր, պատասխաններ, մեկնաբանություններ